WALA pay ensaktong petsa sa opening sa klase ang Department of Education kun DepEd luyo nga may tulo ka gisogyot nga petsa alang niini.
Matud ni Romelito Flores, DepEd GenSan Schools Division Superintendent sa pagkakaron nag-agad pa sila sa desisyon sa ilang DepEd national office kalabot sa opening sa school year 2021-2022.
Gibutyag ni Flores nga miduso na og mga petsa si Education Sec. Leonor Briones kang Pangulong Rodrigo Duterte alang sa abli sa klase nga mao ang August 23, September 6, o September 13 ning tuiga.
Giangkon hinuon ni Flores nga bisan asa nga petsa ang mauyonan, sa iyang tan-aw andam na sila sa DepEd GenSan sa abli sa klase, tungod nakaplastar naman usab ang mga modules ug gahulat na lang usab ang mga magtutudlo.
Luyo nga ginahulat ang petsa sa school opening, giklaro ni Flores nga wala gihapoy face to face classes human usab gibalibaran sa Pangulo ang gipresenta ni Sec. Leonor alang sa face to face classes. Samtang gibutyag ni Flores nga sa Hulyo 10 na ang closing sa klase ning kasamtangang school year.
