Inihayag ng Philippine Overseas Employment Administration (POEA) na tinatayang nasa 7,000 nurses ang pinayagan para sa overseas employment ngayong taon sa gitna ng COVID-19 pandemic.
Sinabi ni POEA deputy administrator Bong Plan na 100% na pagtaas ito mula sa 3,500 deployment cap noong nakaraang taon.
Ayon kay Plan, isa sa mga rason nila sa pagpapataas ng deployment cap ay dahil sa bumababang bilang ng COVID-19 infections sa bansa na nagreresulta sa low demand para sa nurses.
Dagdag ni Plan, madagdagan pa ang bilang ng lisensyadong nurses at iba pang health care workers sa hinaharap dahil sa mga gaganapin na licensure exams.
Ibinahagi naman ng POEA deputy administrator na in demand ngayon ang health workers sa mga bansang United Kingdom, Germany, United States, at Saudi Arabia.
