MIDANGOP sa kapulisan ang usa ka delivery rider human nga nabiktima matud pa siya sa pagpangilad sa usa customer nga buot magpa book og flight padulong sa Kabisayaan.
Ang reklamante ang giila nga si Bennie Boy Dionarce, 30-anyos temporaryong nanimuyo sa Brgy. Mabuhay ning dakbayan ug tubong Quezon City sa kaulohang bahin.
Sumala pa sa report sa maong biktima nga adunay mikontak niya aron magpa book matud pa og flight pinaagi sa online payment sa kantidad nga Php 2,150.
Mibayad matud pa sya pinaagi sa convenient store sa Brgy. City Heights apan sa dihang nakabayad na dili na matud pa kini makontak.
Dako ang pagkadismaya ni Dionarce tungod sa kadakong kantidad ang nakuha gikan kaniya nga pipila ka adlaw niyang gihaguan.
Gitugyan sa San Isidro police station ang reklamo ngadto sa Anti-Cybercrime Unit -12 alang sa pag trace sa numerong gi-alegar nga nang-scam sa naasoy nga delivery rider.
Samtang sumala pa sa San Isidro PNP nga dili lamang ka-usa ka higayon nga adunay nagpatala nga mga sama ni Dionarce kabahin gihapon sa maong problema ug makonsiderang problema kini sa mga manginabuhing delivery riders sa siyudad. I MJ Fernandez
