Ginsalakay sang isa ka Mitsubishi Delica Van ang poste sang street light kag puno sang narra matapos aksidente ini nga naglapaw sa center island sang Pueblo de Panay sa Brgy. Dinginan, Roxas City.
Ginkilala ang driver sang salakyan kay Aljessie Alivio, 35-anyos, katapo sang RCERT kaupod ang iya mga pasahero nga sanday Jessie Alivio, 61-anyos; Adelfa Alivio, 60-anyos; Mary Jesidel Alivio, 36-anyos kag isa minor de edad nga bata nga babayi nga lunsay mga residente sang Brgy. Balijuagan, sining syudad.
Sandig sa imbestigasyon sang Roxas City PNP, samtang ginasubay sang Delica Van ang dalanon sa Brgy. Dinginan, hinali nalang nadulaan sang kontrol sa pagmaneho ang driver nga si Aljessie.
Bangud sa natabo, nag-angkon sang kahalitan ang nasambit nga salakyan matapos bumunggo sa poste kag sa puno sang narra.
Nakaagom naman sang pilas sa baba ang minor de edad nga bata nga gilayon naman nga gindapatan sang pauna nga pagbulong sang Roxas City Emergency Response Team. Nagpamalibad naman nga magpadala sa ospital ang magpamilya matapos ang natabo nga insidente. | Judy Ann Juare
