Naga padayun pa ro imbestigasyun it Kalibo PNP kaangot sa natabo nga pagpanakaw sa mga baligya it daywa ka negosyante it isda sa talipapa sa may Kalibo Shopping Center.
Sa report, bandang ala una it kaaganhun kat may mapansin ro guwardiya sa Kalibo Shopping Center nga mga binatilyo nga nagalibot-libot sa talipapa.
Bangud kara, insigida segun rayang tumawag sa Kalibo PNP ag kat respondehan, nasayuran nga tinakaw ro baligya nga isda it daywa ka negosyante nga sanday Jennilyn Andrade ag Gil Nadua nga parehung residente it C. Laserna St., Kalibo, Aklan.
Kapin sa 30 kilos it bangus ag 10 kilo tuna ro tinakaw kay Andrade nga nagabalor it P9,000 samtang 40 kilos nga bangus ro tinakaw kay Nadua nga nagabalor it P15,000. / ANN DESLENE SALAZAR
Photo credit: AKEAN FORUM
