Nagreklamo sa Kalibo Municipal Police Station ro daywa ka mga estudyante matapos nga mabiktima it sangka miyembro it LGBTQ.
Base sa reklamo it mga biktima, may nag agto sa andang boarding house nga sangka bading bandang alas 7 it agahun ag nagpakilaea nga igbata it sambilog sa mga biktima ag sinugo pa raya nga tawagan sa cellphone ro anang ina.
Sa kasagsagan segun it andang pag istorya hay naghueam segun ro bading it P3,500 sa estudyante sa promisa nga igabalik kara ro kwarta bandang alas 5:30 it hapon.
Nasayuran nga bumalik gali sa andang boarding house ro bading nga suspek bandang alas 12 it udtro-adlaw ag sambilog pang estudyante ro ginhambaean kara nga kung pwede hay bayluhan ro anang P1,000.
Pero kat nagbalibad ro biktima hay ginhueaman man nana raya it P1,500 sa promisa nga igabalik ro kwarta it ala 1 it hapon pero bangud owa eon nakabalik ro suspek ngani ginpakamayad nanda nga magreport sa Kalibo MPS. // ANN DESLENE SALAZAR
