Nag-downgrade ron sa pink zone ukon buffer zone halin sa anay red ukon infected zone sa African Swine Fever ang mga banwa kang Sibalom kag San Jose de Buenavista samtang may darwa pa ka banwa nga nag-apply para sa reclassification.
Gin-reclassify kang Agosto 5 ang banwa kang Sibalom matapos nga wara ron kang may nabalhag nga kaso kag ASF sa sulod kang sangka tuig suno kay Antique Provincial Veterinary (ProVet) Public Health Division chief, Dr. Marco Rafael Ardamil sa diin urihi nga may kumpirmado nga kaso ang banwa kang Hulyo 26 kang tinalikdan nga tuig 2023 sa Barangay Pangpang.
Samtang, nakabaton man kang approval para sa reclassification ang banwa kang San Jose de Buenavista kang bulan naman kang Hulyo.
Suno kay Dr. Ardamil, may 139 ka manugsagod ka baboy ang inisyal nga pagatugruan kang sangka idik kada isara halin sa Department of Agriculture para sa sentinelling sa masunod nga bulan.
Nagpatigayon naman ang DA, ProVet kag Municipal Agriculture Office kang validation para sa kahandaan kang mga hog raisers para sa sentinelling nga amo naman ang magadetermina kun may rugyan pa kang presensya kang ASF virus pagkatapos kang ginhiwat nga biosecurity measures.
Samtang, nagalaum naman ang mga banwa kang Hamtic kag Belison nga magapanaog man sanda halin sa red zone paadto sa pink zone.
Kun madumduman, urihi nga nakabalhag kang kaso ang Hamtic kang Oktubre 19, 2023, samtang ang Belison naman kang Nobyembre 9, 2023.
