NAGHILAK nga midangop sa Brigada News FM ang usa ka ginang nga si Elsie Ma-ma nga gikan pa sa Barangay Crossing Rubber, Tupi, South Cotabato tungod tulo kaadlaw nga wala niini nakita ug nakontak ang iyang 17-anyos anak nga babaye human milakaw sa ilang balay.
Segun ni Ma-ma, Setyembre 8 sa buntag mihawa sa ilang balay iyang anak nga si Alyas Cristel aron moeskwela bitbit niini ang iyang bag ug nakasul-ob og pantalon ug sanina.
Ang pagtuo sa inahan nga miadto kini sa eskwelahan apan nahibulong siya kay wala na kini miuli hangtod naghapon. Nagtoo lang usab si Elsie nga natulog kini sa balay sa iyang higala o paryente.
Apan pagkabuntag sa Setyembre 9 iyang gisusi ang mga balay nga posibleng giadtuan sa dalaga lakip ang eskwelahan niini apan wala matud pa didto ang iyang anak.
Miduol sa Tupi Municipal Police Station, ug sa mga police station sa GenSan ang ginang aron pangitaon ang iyang anak lakip sa lahi-lahi nga barangay sa syudad apan pakyas kini hangtod nga miadto siya sa Brigada aron ipanawagan ang nawala niyang anak.
Sa pagpanubay sa Brigada team sa tanang impormasyon gikan kang Ma-ma nasayran nga dunay giubanan ang iyang anak ug didto kini nanarbaho.
Pinaagi sa mga litrato ug ebidensya sa mensahe nga gipakita sa inahan nakontak sa Brigada team ang babaye nga giubanan sa dalaga ug gihangyo nga paulion si Alyas Cristel tungod nabalaka na ang iyang mga ginikanan. Samtang pagka-Setyembre 10, alas 4 sa hapon nakadawat og tawag si Ma-ma nga dunay babaye nga nagturn-over kang Cristel sa presento sa San Isidro Police station ug didto na niini gikuha ang iyang anak ug gidala pauli sa ilang balay sa Tupi, South Cotabato.
Dako ang pagpasalamat ni Ma-ma sa Brigada nga sumala pa maoy nakakontak sa babaye nga giubanan sa iyang anak ug maoy hinungdan nga nakita niya kini human sa tulo kaadlaw nilang nga pagpangita.
Nasayran nga nanarbaho diay ang iyang anak isip tigbantay og bata sa usa ka balay sa Barangay City Heights ning dakbayan. Nawala ang kabalaka sa ginang dihang nakit-an niya ang iyang anak nga walay daotang nahitabo ug anaa kini sa maayong kahimtang. I Enamie Mogpon
