CAMARINES NORTE- Karagdagang P50.00 sa arawang sweldo ang sasalubong sa mga job order at contractual employees ng Lokal na Pamahalaang Bayan ng Basud, Camarines Norte ngayong 2023.
Ito ay makaraang maaprobahan nitong Lunes, Enero 9 sa ikatlo at huling pagbasa ang ordinansa na nagtatakda ng karagdagang sweldo sa isinagawang regular na sesyon ng Sangguniang Bayan.
Sa ilalim ng “The 2023 daily wage rate of job order and/or contractual employees in LGU Basud ordinance, nasa P300. 00 na ang pinakamababa hanggang P1, 200.00 ang magiging arawang sweldo ng isang job order at contractual employees depende sa position title.
Pinakamataas ang Technical Consultant na nasa 1, 200.00 ang arawang sweldo, P500.00 kapag Engineer, Architects, Nurse, Social Worker, Medical Technologist at iba pang Licensed Professional.
P450.00 naman kapag Draftsman, P423.00 sa Barangay Health Aide, P400 sa Computer Maintenance Technologist/Computer Programmer, Mechanic at Social Welfare Aide.
Nasa P350 naman ang magiging arawang sweldo ng mason/welder/plumber, Bookkeeper, Heavy Equipment Operator, clerk at driver.
Habang ang farm worker, Laborer/Utility ay magiging P300.00
Itinatakda sa section 4 ng ordinansa ang mga qualifications para sa mga nabanggit na posisyon.
Ayon sa ordinansa mahalaga ang trabaho ng mga job order at contractual employees dahil nagsisilbi itong karagdagang manpower sa mga regular na empleado upang maipatupad ang mga programa at proyekto ng LGU.
Nang dahil sa pagmahal ng presyo ng mga bilihin kahit umano ang pangunahing pangangailangan ng kanilang pamilya ay hindi nila maibigay.
Dahil dito nagpasya ang LGU na kahit kaunti ay madagdagan man lang ang kanilang arawang sweldo sa kabila ng malaking kabawasan sa Internal Revenue Allotment o IRA ng munisipyo dahil sa Mandanas law.
