Daan nang dunay panagbangi ang inahan ug anak hangtod nga nisangpot na sa ngilngig nga pagpanunggab nga gikamatay sa inahan.
Nasayran nga pito ka mga dinunggaban tumong sa tiyan hinungdan sa hinanaling kamatayon sa biktima nga si Dolores Barinque Celocia, 57 anyos nga taga- Purok 7-A, Sto. Rosario Chapel, Nograles Gym, Bucana, Brgy. 76-A, ning syudad.
Kahinumdoman nga sa imbestigasyon sa San Pedro Police Station, pasado alas singko sa milabay’ng adlaw, ang biktima miadto sa balay sa usa ka Newlyn Llamis Perla, 35 anyos, house keeper, residente sa nahisgutan nga dapit.
Nasayran nga si Newly mao ang live in partner sa tomboy nga anak sa biktima nga nailang si Devine Celocia Lim, 38 anyos, residente sa nahisgutan nga lugar aron nga mangolekta sa kulang nga bayad sa tubig.
Sumala ni Newly, miabot sa ilang balay ang biktima nga daw lango sa ilimnong makahubog aron nga maningil apan misangpot sa init nga panaglalis sa biktima ug sa nahisgutan.
Atol sa ilang panaglalis, mipatunga ang suspek nga si Devine apan kalit kini nga mikuha ug kutsilyo ug gidunggab sulod sa pipila ka higayon ang biktima.
Dugang nasayran nga awayon ang inahan ug ang suspek, gani niabot na sa Brgy. ang ilang panaglalis kaniadto.
Kasamtangan, nag-atubang na og kasong parricide ang suspek nga anaa na balhug sa San Pedro PNP.