Kumikilos na ang Department of Agriculture upang tugunan ang pinangangambahang food crisis sa bansa na epekto sa nagpapatuloy na giyera sa pagitan ng Russia at Ukraine.
Paliwanag ni Agriculture Sec. William Dar nagsumite na sila ng action plan tatlong buwan na ang nakakaraan at agad naman itong inaprubahan ni Pangulong Rodrigo Duterte.
Kabilang dito ayon kay Dar ang pagpapalakas ng lokal na produksiyon ng pagkain sa pamamagitan ng makabagong teknolohiya.
Naglaan din ang DA ng P20-billion para sa fertilizer subsidy ng mga magsasaka sa buong taon, at P9-billion pondo para sa wet-season planting ng palay.
Maliban dito kasado na rin umano ang mga mitigating measures sakaling mas lumala pa ang krisis na epekto ng pandemya at giyera sa Ukraine katulad nang ibinabala ng Philippine Chamber of Agriculture and Food.
