LEGAZPI CITY – Target kan Department of Agriculture (DA) Bicol na makapagtanom an mga paraoma nin hybrid rice asin certified seeds sa labi 100K na ektarya sa kabikolan ngunyan na Wet Cropping Season.
Ini segun mismo kay DA-Bicol Information Officer Chief Lovella Guarin, kun sain ipighayag kaining nakapanao na sinda nin manlaen laen na mga agricultural intervention sa mga benipisyaro sa nasambit na rehiyon para sa wet cropping season nganing masyertong bastante an supply nin bagas bago an piglalaoman na La Niña.
Naresibe na kan mga paraoma na labi 60K sako nin hybrid rice na nagkakantidad nin P3,400 na fertilizer discount kada ektarya, P5K na tabang pinansyal sa kada saro na farmers na nagtatanom nin duwang ektarya pababa, asin mga biofertilizer sa mga clustered association.
Kaiba sa mga natawan iyo an Albay, na igwa nin 15,500 bags nin hybrid rice asin 28,815 certified seeds, Camarines Norte na igwa nin 6K hybrid rice asin 9,444 certified seeds, Camarines Sur na igwa nin 26, 995 hybrid rice asin 66,040 certified seeds, Catanduanes na igwa nin 800 hybrid rice asin 5,012 certified seeds, Masbate na igwa nin 3,900 hybrid rice asin 20,134 certified seeds, mantang an Sorsogon igwa man nin 7,010 hybrid rice asin 18,255 certified seeds.
