LEGAZPI CITY – Pigkumpirnar kan Commission on Elections (COMELEC) Albay na maimplementar sinda nin curfew hours sa banwaan kan Libon sa aldaw nin Sabado makalihis ining isairaom sa COMELEC control katakod kan paparaning eleksyon.
Segun kay COMELEC Albay Provincial Election Supervisor Atty. Ma. Aurea Bo-Bunao, mapuon an curfew hours alas 10 nin banggi hasta alas 4 nin maagahon.
Sa mga nasambit na oras, kinakaipohan na wara nang mahihiling na tawo o mga residente sa luwas asin dapat nasa laog sana sinda kan saindang mga harong.
An mga ide-deploy na uniformed personnels an malibot sa mga barangay tanganing i-monitor asin hilingon an sitwasyon asin mandakop sa mga mabalgar.
Obheto kaining maprotehiran an gabos na kandidato asin mga residente ngunyan na eleksyon asin maibetaran an anuman na dai piglalaomang mga insidente.
Mientrastanto, epektibo an curfew hasta sa Nobyembre 10 ngunyan na taon.
