LEGAZPI CITY – May pigklaro an Civil Service Commission (CSC) Bicol dapit sa ilulunsar na computerized examination (COMEX) sa rehiyon.
Segun kay Regional Director Atty. Daisy Punzalan-Bragais, bako pa ini online exam nan makakapag-take an examinees dawa nasa harong sana.
An exam, gigibuhon sa opisina ninda, asin sa ngunyan igwa sindang 20 computer units para sa examinees.
Sa proseso kan COMEX, pagkatapos kan oras kan exam, mina-shutdown su boot an computer, saka ipa-process kan Central Office asin ibabalik sa Regional Office nganing i-award sa examinee an resulta.
Alagad, an online exam, saro man sa mawot na mangyari kan komisyon kaya padagos pang pig-aadalan ini nganing magin posible sa maabot na panahon.
Mientrastanto, piglalaoman man kan ahensya na mabebenipisyaran sa paglunsar kani an mga dai nakapag-file para sa civil service exam sa maabot na bulan nin Marso ngunyan na taon.
