Sangkiri nga nagtaas ro numero it mga ginatamaan it COVID-19 virus sa probinsiya it Aklan.
Base sa datos it Aklan Provincial Epidemiological and Surveillance Unit, may 56 ka mga panibag-ong kaso ro narekord sa probinsiya.
Dugang pa sa report, may 15,354 katawo sa Aklan ro gintamaan it COVID-19 virus halin kat mag-umpisa ro pandemya.
Ro mga banwa nga may pinakamataas nga numero it aktibong kaso it nasambitan nga sakit hay ro Kalibo nga may 16; ginsundan it Ibajay nga may 7; Malay nga may lima ka kaso; ag Lezo ag New Washington nga may tig-tatlo nga kaso.
Ro Aklan hay nagrekord man it mataas nga positivity rate sa international threshold nga nagaabot sa 5%.
Padayon man ro pagpahanumdom it mga otridad sa publiko nga pagasundon ro mga minimum health protocols agud malikawan ro banta it Covid-19./JIL B. LACSON
