Nakabsan sa kinabuhi ang usa ka construction worker human kini gipusil sa usa sa iyang gidunggab pasado alas 6 sa hapon sa milabayng adlaw, Abril 28, 2024 sa Barangay Tupas, lungsod sa Ronda.
Ang namatay giila nga si Zaldy Baylosis, 33 anyos, Lumad nga taga Bindoy Negros Oriental kinsa naka-angkon og pinusilan sa babaw nga bahin sa iyang dughan ug wala nga bukton ingon man samad sa tangkugo.
Samtang, ang tulo ka mga biktima sa pagpanunggab mao sila Raymond Quisay, 32 anyos kinsa naigo sa buko-buko, Jacob Grayan, 20 anyos kinsa nakaangkon og dinunggaban sa kamot. Samtang ang ikatulo nga biktima kinsa maoy tag-iya sa balay mao si Pascual Alvarez , 71 anyos.
Sa imbestigasyon sa kapulisan sa Lungsod sa Ronda, ang suspek nga si Baylosis sayo palang nianang adlawa nibale ug ₱1,000 sa iyang foreman arun mouli. Gihatud kini sa iyang kaubanan sa sakayan sa Ceres pasado alas 7 sa buntag , apan nahibong nalang ang iyang mga kaubanan pasado alas 6 sa gabie, nibalik kini sa maong nahitaboan og didto nahitabo ang pagpanuggab.
Nibunot ang suspek og kalibre 38 nga revolver sa iyang hawak. Nahimong depensa sa biktima ang iyang kaugalingon nga miresulta sa panaglalis diin aksidenteng na-discharge ang armas hinungdan nga naigo ang suspek.
Gidala sa Ronda Rural Health Unit ang duha ka samdan nga biktima aron matambalan diin ang usa ka biktima nga si Quisay kay anaa sa talandugon nga sitwasyon. Samtang boluntaryong nitahan sa kapolisan ang laing biktima kinsa nakapusil sa suspetsado.
Ang patayng lawas sa suspek gidala na sa pinuy-anan niini sa Bindoy, Negros Oriental.//