Balhog sa presinto dos ang usa ka lalaki nga nagpailang sakop sa Philippine Army atol sa gipahigayong checkpoint sa mga sakop sa Talomo Police Station sa Bypass Road, Ulas, Davao City alas 11:15 sa buntag kaganiha.
Ang suspek giila nga si Emma Alfredo Lapura 26 anyos, construction worker, lumad nga taga-Malita, Davao Occidental kinsa nakasoot pa og full camouflage uniform nga nagsakay sa gimanehong motorsiklo dihang gipara human namatikdan nga nagzig-zag ang pagpadagan sa iyang motor.
Nagduda ang mga pulis sanglit walay drivers license ang suspek ug nagpaila na hinoon nga sakop sa armadong kusog sa Pilipinas apan nagtahap ang otoridad sanglit walay logo ang gipakita niining AFP ID hinungdan nga gi-hold una ug giverify ug didto nasayran nga dili kini myembro sa Army bisan sa Task Force Davao rason nga giposasan.
Nadiskubrihan usab nga kinawat ang motor nga gigamit sa suspek kung asa narekober usab gikan sa iyang posisyon ang plastic replica pellet gun sa Caliber .45 pistol, peke nga AFP ID, full military uniforms, combat boots, citation ticket ug dokumento sa motorsiklo.
Gihan-ukan og kaso nga gilangkuban sa Art. 171, 177 ug 179 sa RPC ug R.A. 4136, 10883 ug 10591 Sec. 3 (q) ang suspek. BNFM-DAVAO
