Gipailawum na sa cross matching ug ballistic examination sa PNP Regional Crime Laboratory ang mga narekober nga basiyo sa bala gikan sa crime scene sa shooting incident sa San Antonio, Brgy.19-B, Bajada sa miaging Huwebes sa hapon.
Una niini duha ka deformed fire bullet sa .45 caliber pistol ang narekober sa mga sakop sa SOCO gikan sa panimalay sa biktima nga giilang si Virgel Capote, alias “Juan”, 40 anyos, construction worker, residente sa maong lugar.
Si Capote ang kalit gisulod sa wala mailang lalaki sa iyang balay dayon gipusil ayha misibat kuyog ang lain pang lalaki nga nagsilbing lookout padulong sa Ladislawa Garden Village.
Hustisya ang panawagan karon sa inahan sa biktima nga si Agapita Capote kinsa maoy unang nakakita sa anak nga nagbuy-od ug naligo na sa kaugalingong dugo.
Hinoon ang kapulisan padayon sa gihimong imbistigasyon.BNFM-DAVAO
