Subling gipasidan-an sa Commission on Election XI ang mga kandidato nga likayan ang premature campaign ug paaboton na lamang ang Oktubre 19 diin magsugod ang pangampanya nga matapos sa Oktubre 28.
Kini human nga dunay 28 ang gi-isyuhan sa COMELEC XI og show cause orde nga mga kandidato alang sa Barangay ug Sangguniang Kabataan elections tungod sa premature campaigning sa Davao Region.
Gibutyag ni COMELEC 11 Assistant Regional Director ug spokesperson Gay Enumerables nga sa maong ihap, duha niini naggikan sa Davao Oriental ug 26 sa Davao del Norte.
Gipaklaro ni Enumerables nga naggikan ang maong datos sa task Force Anti-Epal tungod sa usa ka poster diin anaa ang hulagway sa mga kandidato partikular na diha sa Island Garden City of Samal.
Sa kasamtangan, sumala pa ni Enumerables gihulat pa sa ilang opisina nga makumpleto ang mga gikinahanglang dokumento aron ilang maduso sa Law Department sa Comelec Central Office.