BICOL – PIGCIERTO kan Commission on Elections o COMELEC-Bicol an pagsunod kan saindang mga personale sa tamang protocols sa pagsasagibo kan Oplan Baklas o pagtatanggal kan mga campaign materials na mayo sa tamang lugar.
Segun ki COMELEC Bicol Regional Director Atty. Rafael Olaño, sya mismo soboot an nagpapagiromdom sa saindang mga tauhan dapit sa tamang proseso kun saen mahagad nguna nin permiso sa maysadiri nin sarong pribadong lugar kun igwang hahalion na campaign posters.
Siring man nagpapadara nguna nin surat sa kampo kan mga kandidato kun igwa sindang naaraman na iligal na nakapaskil tanganing sinda na mismo an boluntaryong magtanggal kaini.
Kumpyansa an opisyal na ini an parte sana kan saindang mandato na magpautob nin mga lakdang para masierto na nasusunod an mga ley, partikular an sakop kan lawful election propaganda.
Mantang ipinahayag man kaini na naging matrayumpo an isinagibong oplan baklas sa mga probinsya kan Albay, Camarines Sur asin Masbate.
Sa katunayan soboot mayo sindang nareresibeng reklamo gikan sa dawa sisay man na kandidato sa national level katakod kan nasabing aktibidad.
Naglalaom man an Comelec na magiging resposable asin padagos na masunod an mga kandidato asin supporters katakod kan tamang lugar na pwedeng pagbugtakan nin mga campaign materials tanganing dai man masayang an saindang kwarta asin pagal sa pagpapaskil sa mga ini.
