LEGAZPI CITY – Sa ngunyan, wara pang nareresibe an Commission on Elections (COMELEC) Bicol nin mga reklamo dapit sa mga kandidatong nagpapababakal nin boto sa paagi kan pagtao nin kwarta sa mga botante.
Alagad, segun kay COMELEC Bicol Regional Director Atty. Ma. Juana Valeza, igwa sindang naresibeng mga impormasyon na bako kwarta an pigtatao.
Sa ebalwasyon sa mga impormasyong naresibe, kadaklan su boot na mga pigtatarao kan ibang mga kandidato asin supporters iyo an mga goods.
Alagad, sakop man giraray ini sa Kontra Bigay kan COMELEC. Sinabi niya, lambang mga reklamo asin impormasyon, pig-aagi sa ebalwasyon nganing hilingon kun igwa nin supisyenteng basehan nganing masangatan nin magkakanigong kaso.
Liwat na pangapodan ni Valeza na punduhon na an vote buying nganing dai na magresulta pa sa mga problema.
