SUBLING nagbahad ang labaw sa pambansang kapulisan sa nasud batok sa personahe nga lambigit sa cockfighting activities partikular e-sabong.
Ang bahad ni Chief PNP PGen. Dionardo Carlos ang atol sa pagbisita niini sa Police Regional Office (PRO) 12 sa Barangay Tambler, GenSan nakalabay’ng adlaw.
Sa gihimong ‘talk to men’ ni Carlos, gihingusgan niya nga kasong administratibo ang atubangon sa pulis nga dunay silot nga pagkataktak sa serbisyo o pagkasuspenso.
Kini kung madakpan ang pulis nga nagdula og online sabong atol sa iyang duty.
Sa PNP, butyag ni Carlos sa kapulisan sa rehiyon gikan Enero 01 hangtud Pebrero 20 pito ka reklamo ilang nadawat batok pulis nga lambigit sa e-sabong.
Gi-ban sa PNP sa tanan nilang personahe ang ‘e-sabong’, gimanduan ang mga labaw sa matag police office nga inspeksyonon ang cellphone o gadget sa personahe kung dunay na-install nga app.
Lakip sa tumong sa pagbisita ni Gen. Carlos sa PRO-12 mao ang masayran ang latag sa seguridad alang sa taliabot nga national ug local election sa May 09.
