CAMARINES NORTE- Ipapatupad na ng Department of Education (DepEd) ang limang araw na face-to-face classes sa mga pampublikong paaralan simula sa Nobyembre 2.
Kaugnay nito ay nagpaalala si Camarines Norte Schools Division Superintendent Nympha Guemo na mahigpit pa ring ipatupad ang health protocols kontra COVID- 19 sa mga eskwelahan.
Sa programang DepEd Hour, sinabi ni Guemo na bagamat babalik na sa dati o pre- pandemic era ang pagpasok sa eskwelahan ay dapat mahigpit na sundin pa rin ang health protocol tulad ng pagsusuot ng face mask at paggamit ng alcohol.
Ani Guemo, hindi pa rin nawawala ang virus at sa katunayan ay mayroon pa ngang natuklasang bagong COVID- 19 variant.
Dapat umanong ipatupad ang mga kinakailangang pag iingat para hindi makuha ng estudyante at mga guro ang virus.
Una na ring sinabi ng DepEd Central Office na tuloy pa rin ang pagpapatupad ng limang araw na face-to-face classes sa mga pampublikong paaralan simula Nobyembre 2 sa kabila ng kumpirmasyon ng Department of Health (DOH) na nakapasok na sa bansa ang Omicron XBB subvariant at XBC variant ng COVID-19.
Sabi ni DepEd Spokesperson Atty. Michael Poa, wala pang anumang amendments o pagbabago sa Department Order (DO) No. 34.
