Angol ang tulo ka indibidwal nga sakay sa motorsiklo human gikabangga niini ang bus, pasado alas 4:00 sa kadlawun, Hunyo 1, 2024 sa C.P Garcia Highway, Diversion Road, Crossing Bypass Road, Maa ning syudad.
Giila sa kapulisan ang mga nasamdan nga usa ka lalaki, drayber, angkas nga hamtong nga babae ug usa ka batang babae.
Sa inisyal nga imbestigasyon sa Maa Police Station, nasayran nga naglawig ang bus gikan sa Northbound, samtang ang motor naggikan sa Southbound.
Apan pag-abot sa lugar nga nahitaboan, wala damha nagbangga ang nahisgutang mga sakyanan. Tungod sa kakusog sa impact, nakaangkon ang mga biktima og nagkadaiyang mga samad sa ilang lawas.
Gilayong miresponde sa lugar ang 911 Ambulance Med-06 sa Brgy. 19-B cares, MAA Cares ug daling gidala sa SPMC ang mga nahisgutan alang sa physical examination ug medical treatment.
Gikustodiya na karon sa Maa Police Station ang nahisgutang mga sakyanan alang sa tukmang disposisyon sa pagpasaka og kaso.