HALOS kadaghanan sa mga nagpositibo sa COVID-19 sa Barangay San Isidro, GenSan ang wala nabakunahan.
Kini ang gibutyag ni Brgy.San Isidro Kapitan Edward Frederick Jefrox Yumang dungan sa pagkumpirma nga ang pagtakod sa virus ang pamilya-pamilya na.
Giangkon niini nga ang ilang barangay ang may pinakadaghang kaso sa COVID-19 sa 26 ka barangay sa GenSan, asa as of September 9 mokabat sa 213 ang aktibong kaso.
Sa kinatibuk-an sukad nagsugod ang pandemya, ang Brgy. San Isidro adunay 2,212 ka confirmed cases, 1,959 ang nakarekober, ug 48 ang namatay.
Rason matud pa nganong sila ang may daghang kaso sa COVID-19 sa tanang barangay tungod kadaghanan residential, asa anaa ang halos tanang subdivision magamay o madako ug ang pasyente ang gikan sa ubang lugar ug miuli sa ilang barangay.
Apan gibutyag ni Yumang nga kadaghanan sa mga nagpositibo sa COVID-19 sa ilang barangay ang asymptomatic ug anaa sa edad 40-anyos pataas. Dugang ni Yumang, may pipila ka lugar na usab sa barangay nga gi-lockdown aron mapugngan ang pagkatag sa virus gawas pa sa pipila nga anaa sa ospital.
