GIPASALAMATAN ni Bishop Cerilo Casicas, sa Diocese of Marbel si South Cotabato Governor Reynaldo Tamayo tungod sa pag-veto niini sa resolution 137 nga nag-amenda sa Environmental Code sa probinsya nga nagtugot sa open pit mining.
Sa gipagawas nga official statement giangkon ni Casicas nga gidungog sa Ginoo ang paghangyo sa katawhan nga i-veto sa gobernador ang maong resolusyon ug gipasalamatan kay midapig si Tamayo sa katawhan ug sa kinaiyahan bisan pa sa pressure ngadto kaniya.
Lakip gipasalamatan ni Casicas ang tanang katawhan nga miduyog sa peaceful march rally, sa mga pag-ampo ug sakripisyo, ingon man ang multisectoral support groups, mga kabatan-unan, mag-uuma, medical practitioners, mga katigulangan, media, irrigators associations, IP’s, mga kaigsuunang Muslim ug daghan pa.
Luyo nga gi-veto ni Tamayo ang amenda sa Environmental Code apan giangkon ni Bishop Casicas nga wala pa nahuman ang pakigbisog batok sa open pit mining tungod ang outgoing Sangguniang Panlalawigan members ang mahimo pang i-override ang veto ni Tamayo.
Apan sa kasamtangan, giangkon sa obispo nga nagmadaugon ang kamatuoran ug tinuod nga naglihok gayud ang mga kamot sa Ginoo.
Gani, giawhag niini ang tanan nga magpabilin nga vigilant hangtud nga ang kasamtangang bahad nga ma-amendahan ang pagtangtang sa ban sa open pit mining ang hingpit nga makumpleto.
