AYUHON NA ang mga wirings sa panimalay ug mga lock sa pultahan ug bintana aron malikayan ang sunog ug sayon ang paggawas kon aduna nay kalayo og buot makagawas sa panimalay.
Pinaagi sa 89.5 Brigada News FM Gensan nagapahibalo si SFO1 Filamer Acub nga usa sa angay bantayan sa katawhan sa mga panimalay ang mga linya sa kuryente, mga wirings nga daan na unya mabasa sa tubig kon mag ulan kay nagaresulta kini sa pagkalayo ug makasunog tungod sa short circuit.
Ang ikaduha niini nga pahinumdom kabahin sa mga lock sa balay sa bintana ug pultahan, mas maayo daw nga kanang sayon lang ablihan kon mogawas sa balay bisan sa bintana aron nga kon may sunog sayon nga makagawas.
Dili daw maayo ang lock sa pultahan nga kinahanglan pa susian bago maabli, labaw na nga dili maayo kon daghan og lock nga gahi kaayo ablihan.
Gidugang ni Acub nga bisan sa bintana mas maayo kon bisan mga bata kaya nga maka-abli niini aron makagawas kon may sunog.
Ang ikatulong pahinumdom ni Acub nga dapat mamahimo nga familiar ang tagbalay sa mga lutsanan kon may sunog.
Gihimo ang mao nga mga pahinumdom gumikan sa nagkasunod nga mga sunog milabay nga semana dinhi sa syudad. ( Ver Diazon)
