Umabot sa P686,800 nga balor it suspected shabu ro nakumpiska halin sa 38 anyos nga beautician sa ginkasa nga buy bust operation sa Sitio Matawhay, Barangay Tabuc Suba, Jaro, Iloilo City kaina it kaaganhun.
Kapin sa 101 grams it suspected shabu ro narekober halin kay Jonel Hulipa alyas ‘Mahal’ ag residente sa nasambit nga lugar.
Si Hulipa hay inaresto it gintingob nga pwersa it Regional Police Drug Enforcement Unit 6 ag Iloilo City Police Station 3, matapos magbaligya it sangka sachet it suspected shabu sa sangka poseur-buyer kabaylo it P12,000.
Base sa report, ginagamit it suspek ro anang kwarto para sa anang mga customer nga gustong gumamit it illegal nga droga.
Narekober sa posisyon it suspek ro 27 heat sealed transparent plastic sachets it suspected shabu, buy bust money ag iba pang non-drug items.
Ro suspek hay sa kustodiya eon makarun it Iloilo City Police Station 3 ag magapangatubang sa kasong pag eabag sa Republic Act 9165 or the Comprehensive Dangerous Drugs Act of 2002. / ANN DESLENE SALAZAR
