MADALAG, AKLAN—Ginapatuman sa banwa it Madalag, Aklan do “No Movement Saturday” kung siin do ginapasugtan eang nga magabukas hay do mga parmasya ukon botika.
Base sa ginpaguwa nga Executive Order No. 023 series of 2021 ni Mayor Al Dindo Gubatina, tinutuyo kara nga malimitahan do pagguwa it mga tawo ag makontrol do pagkalat it coronavirus disease sa anda nga banwa.
Nakabaehag man sa nasambit nga EO nga padayon do pagpatuman it border control ag do mga nagaagto sa ibang banwa hay kinahangean nga magbuoe it travel pass ag kung may panaw man sa banwa it Madalag hay dapat nga magbuoe it quarantine pass halin sa barangay.
Dugang pa kara, may skedyul man sa pagguwa do mga residente sa tagsa ka mga barangay ag sa adlaw it Domingo hay napueo eamang nga quarantine pass kada barangay do ginabaton sa paadto sa Brgy. Poblacion.
Sa pihak nga parte, temporaryo anay nga ginabawaean nga magsueod sa nasambit nga banwa do mga micro-finance ag iba pang lending collectors. // SHERRY ANNE REUNIR-VIDAL
