Patay ang isa ka lalaki nga nagabantay sang bulangan matapos ginluthang sang anay preso sa Barangay Poblacion Ilaya, Maayon, Capiz.
Ginkilala ang biktima nga si Rey Lenciano, 32-anyos residente sang nasambit nga banwa samtang ang suspek amo si Ariel Derla Dieta, 25-anyos residente sang Barangay Ambilay, Panitan.
Sandig sa imbestigasyon sang Maayon Municipal Police Station, samtang nagakatulog sa bangko ang biktima sa sulod sang gina-ubrahan sini nga Maayon Cockpit Arena hinali nalang ini ginpalapitan sang suspek kag ginluthang gamit ang indi pa matumod nga sahi sang armas-luthang.
Bangud sini nag-angkon sang patal nga pilas sa tiyan ang biktima nga gintunaan sang iya kamatayon.
Sa karon, nagapabilin nga at-large ang suspek samtang may gintan-ay naman nga P30,000 nga reward sa makatudlo, makakita ukon makadakup sa kay Dieta. | Judy Ann Juare
