Sambilog sa nakikitang motibo sa pagbaril-patay sa kolektor it motor dealer sa Kalibo hay kaangot sa anang trabaho.
Ginkilaea ro biktimang si Julius Cuesta, 30 anyos ag residente it Brgy. Tambak, New Washington, Aklan.
Sa interview it Brigada News FM Kalibo sa daywa ka igkampod it biktima nga sanday Noemi ag Janet, inisyal nanda nga nakikitang rasun sa pagpatay sa andang igkampod hay bangud sa trabaho kara bilang kolektor.
Pero ginklaro nanda nga mabuot raya ag owa it record o kaaway sa andang lugar.
Bukon segun it deserve it biktima nga patyon raya bangud mayad raya nga tawo ag may handum sa kabuhi ag para sa anang pamilya.
Samtang, suno man kay Mrs. Vangie Cuesta, ina it biktima, mabuot ag mahugod si Julius.
Owa man segun raya it nasugid kanda nga problema o nakaaway bangud sa anang trabaho. // ANN DESLENE SALAZAR
