NAGKAGULIYANG ang mga personahe sa usa bakeshop nahimutang sa Purok San Miguel, Barangay Calumpang human ni-dilaab ang kalayo sa mismong himuanan og tinapay sa maong establisimyento.
Subay sa report gikan sa BFP Gensan nadawat nila ang report kalabot niini alas 4 pasado sa kaadlawon Nobyembre 6. Dinhi nasayran nga nanukad ang kalayo gikan sa oven asa may ginaluto nga tinapay ang panadero sa maong bakeshop.
Segun ni FO3 Lester John Muñez, public information staff sa BFP-Gensan nga ang oven sa bakery ang ilang naabtan nga nasunog ug gihulat pa ang naghimo na og imbestigasyon.
Butyag ni Reden Tapao, panadero nga on duty niadtong higayona nga gituohang nag overheat nga oven ang sinugdanan sa kalayo ug maayo kay gilayung gisiguro nga maluwas ang LPG gikan sa nasunog nga oven.
Swerte matud pang wala na mikutay ang kalayo sa light materials nga parte sa maong establisemyento ug walay nahimong samdan sa insidente.
Sa inisyal nga damyos, anaa sa P5,000 tungod wala maapil ang tibuok establismento.
Sumala pa sa BFP nga gisuta ang mas lawom nga hinungdan sa maong insidente. Samtang temporaryong nahunong ang operasyon sa maong bakeshop tungod sa mga damyos nga naangkon niini. I MJ Fernandez
