LEGAZPI CITY – Nakatalaang magkondusir ngunyan na aldaw ki bagong sistema ki Brigada Eskwela an Rotary Club of Legazpi Central sa Padang asin Arimbay Elementary School.
Sa intrivista kan Brigada News FM Legazpi kay RCLC President Neil Andal, sinabi niya na bako arog kan tipikal na Brigada Eskwela an saindang gigibuhon arog kan paglinig asin pagpintura sana kundi katuyuhan kaining mas itatak sa mga kaakian asin mga magurang an tamang pag-ataman sa kapalibutan dugang pa an manungod sa pagkanunod sa pagtatanom.
Nagkapira sa mga isasagibo iyo an tree trimming na obhetong mahale an peligro kan mga kahoy na pwedesir bumagsak sa mga pasilidad asin nagigin kawsa kan pagkabara nin mga sagurong, saro pa an pag power spray o pressure wash nganing mahale an mga lumot sa mga piglalakawan o pasilyo na pwedesir magkawsa ki aksidente, pati na man an pagtanom ki mga namumurak na pananom.
Mientrastanto, highlight kan aktibidad an gigibuhong mosquito fish nursery launching na obhetong mapuho an pagdakol ki namok sa mga eskwelahan asin komunidad nganing makatabang sa pagpababa kan kaso nin dengue asin malaria sa mga kaakian huli ta an nasabing klase nin sira an nagkakaon nin mga kiti-kiti kaya pwedesir ining ilaag sa mga pond o dawa sa mga balde asin drum nin tubig.
Sa ngunyan, pig-enganyar ni Andal an publiko na pangarugan an siring na gawi huli ta sa sadit na bagay na ini mapuon an pagtataong solusyon sa climate change asin nganing magkaigwa nin marhay na pagbabago sa kada komunidad orog na sa kaisipan asin aksyon kan kada indibidwal.
