DAGHANG bun-og sa kalawasan ang nahiagum sa piniriso nga namatay sulod sa selda sa Tambler Police Station sa GenSan. Matud ni Dr. Ricardo Rodaje, National Bureau of Investigation (NBI) Chief medico legal. Migula sa resulta sa gihimo niyang otopsiya nga nakaangkon ang detainee nga si Philip Nocete og hematoma o bun-og sa lawas.
Posibleng gibunalan sumala pa ang piniriso og ‘hard object’, gawas niini nakitaan usab niya ang lawas ni Nocete og ‘contusion’ sa nagkadaiyang parte sa lawas. Samtang sa bahin ni NBI-SARDO chief Atty. Regner Peneza wala pa niini nakita ang opisyal nga resulta sa autopsy apan gihangyo na nila sa central office nga sugdan na ang imbestigasyon.
Sa pagkamatay ni Nocete nga unang nasikop sulod sa bar sa Barangay Calumpang dihang gireklamo og attempted rape. Una nang, gipangalan ni Major Ananias Vasquez, hepe sa presinto ang pipila ka piniriso nga maoy mihimo sa pagpangulat patay kang Nocete. Sa pamahayag ni Major Rissa Hernaez, tigpamaba sa GenSan City Police Office (GSCPO) andam silang makig-alayon sa himoong imbestigasyon sa NBI-SARDO.
