Hugot nga nagpasidaan si Vice Presidential candidate ug Davao City Mayor Inday Sara Duterte ngadto sa publiko nga dili mutoo sa mga tawo nga nagatanyag og ATM nag dunay unod nga kwarta gamit ang UniTeam.
Matud kang Mayor Inday atol sa press conference kagahapon dinhi sa syudad, walay ginapangayo nga membership fee ang ilang partido gikan 20 hangtud 180 sa ilang mga supporters ug mas labaw nang walay ginahatag nga ID ug ATM nga matud pa unod ang P5,000.00
Ang pahimangno sa Mayor nunot sa pagkasikop sa tulo ka indibidwal nga naaktuhan sa Davao City Police Office nga nang-rekrut og mga myembro alang sa UniTeam sa duha ka lokasyon.
Niadtong Pebrero 27, 2022 nadakpan ang mga suspek nga giilang sila si Virginia Almoroto Calape ug Nanette Denopo sa Sto. Niño, Matina nga nagapabayad og tag P25 sa mga recruit nga myembro alang sa Uniteam ID card lamination ug membership processing.
Narekober sab ang cash nga P4,895, mga forms, blank ID cards ug certificate of appointment nga pirmado sa usa ka kanhi secretary isip lead convenor ug laing duha pa ka mga personalidad.
Samtang usa pa ka Rogelio Suarez 52 anyos nga taga Barangay Marapangi, Toril ang gidakop sa Matina Crossing public market nga naaktuhang nagpabayad og P20 alang matud pa sa UniTeam Multisectoral Alliance Movement campaign.
Giklaro usab ni Atty. Joahna Paula Domingo, sakop sa UniTeam’s legal team nga walay ginahimong solicitation ang ilang kampo ug walay si bisan kinsa ang gihatagan og otorisasyon alang sa maong kalihukan. BNFM-Davao
