Problema sa kwarta ug selos ang gitudlong hinungdan sa pagkutlo sa kaugalingong kinabuhi sa 32-anyos nga inahan ug gi-angon ang napulo ka bulan niining anak sulod sa ilang balay sa Brgy. Visayan Village, Tagum City, Davao del Norte kagahapon, Pebrero 28, 2022.
Sumala kang PLt. Col. Jay Dema-ala, hepe sa Tagum Police Station, naabtan na lang sa otoridad nga nagbitay na sa kisame ang mga biktima nga giilang sila si Alyas Marivic ug Baby Boy gamit ang nylon rope.
Dugang ni Dema-ala, ayha ang insidente nagsigi pa og text ang biktima ngadto sa iyang kaipon nga sundalo apan wala kini mireply, ug nakugang dihang nagbahad nga kutlo-on ang iyang kinabuhi ug gipadad-an og hulagway sa ilang anak nga naa nay pisi sa liog busa dali kining girespondihan.
Naabtan sa otoridad ang mag-inahan nga parehong wala nay kinabuhi.
Sigon sa opisyal nga “disturbing” ang maong panghitabo samtang giplastar na alang sa paghaya ang mag-inahan.
Wala sab mipagawas og pahayag ang bana nag sakop sa Task Force Davao sa gidangatan sa iyang mag-inahan.
Sa pikas bahin nanawagan ang otoridad ilabi na sa mga nakasinati og depresyon ug nangita og maistorya, mamahimong magpakonsulta o mokontak sa 0966-351-4518/0917-899-8727 ug suicide prevention hotline sa DOH 0917-899-USAP alang sa Globe/TM Subscribers samtang 0908-639-2672 sa Smart/Sun/TNT Subscribers. BNFM-Davao
