Wala na natabang pa ang usa ka 7 anyos nga batang babaye human kini malumos sa dagat sa Purok 13 Seaside, Barangay Bago Aplaya ning syudad, pasado alas 12:00 sa udto, Hunyo 6, 2024.
Giila ang biktima nga usa ka estudyante nga taga Barangay Lamanan, Calinan District, Davao City.
Sa inisyal nga imbestigasyon sa kapulisan, gibutyag sa uyuan sa biktima nga iyang nakita ang biktima nga naningkamot sa pagluwas sa iyang manghod nga babaye nga hapit nalumos.
Dihang gidala sa biktima ang iyang manghod sa mabaw nga bahin sa dagat, kalit lang ang dakong balod ug kusog nga bul-og sa dagat ang mibira sa biktima sa lawom nga bahin hinungdan nga nangayo sila og tabang.
Miresponde gilayon sa lugar ang Bantay Dagat ug BDRRMC sa Barangay Bago Gallera ug daling gidala ang biktima Adventist Hospital, Bangkal, Davao City alang sa medical intervention.
Apan gideklarang dead on arrival sa doktor.
Sumala ni Pcapt Hazel Tuazon, tigpamaba sa DCPO nga kauban sa biktima nga naligo og dagat ang iyang pamilya atol sa birthday sa anak sa ilang paryente.
Sa karon, gipahiluna na sa pamilya ang patay’ng lawas sa biktima.