REKISITOS na sa pagsulod sa mga beach resort sa Glan, Sarangani Province ang pagbitbit og anti-gen negative result.
Kini gawas sa pagbitbit og DVY Cares QR code sa Glan ug advance booking gikan sa resort nga adtoan.
Matud ni Rhoa Wadingan, acting Glan tourism officer rekisitos kini sa mga ‘beach goers’ gikan sa mga lugar sa rehiyon-12 nga taas og kaso sa Covid-19. Ang dawaton lang usab nga booking sa mga resorts mao ang mga residente nga naa sulod sa rehiyon-12.
Gibutyag usab ni Mayor Vivien Yap, gimanduan na niya ang mga tigdumala sa mga resort nga 40% capacity ang dawaton nga guests.
Ang pagpahugot sa seguridad ang tungod sa pagsaka sa kaso sa virus sa rehiyon lakip ang pagsulod sa mga bag-ong Covid-19 variant.
Matag Mayo, ang Glan ang host sa tinuig nga Sarangani Bay Festival o SarBay Festival ug gikonsidera nga biggest beach party sa Mindanao. ( Rich Gubalani)
Photo by Jake Narte/Sarangani Info. Office
