Nagpabutyag sang pagkadismaya ang pinuno sang City Ordinances & Regulations Enforcement (CORE) Unit matapos nga ang isa sa ila miyembro ang naglapas sa “No Helmet, No Driving” Ordinance nga ginapatuman sa syudad sang Roxas.
Sa interview sang Brigada News FM Roxas City kay Mr. Ronald Amigo, iya ginpahayag nga nasubuan siya bangud sa pihak sang ila pagtimakas nga mapatuman sang intsakto ang mga ordinansa sa syudad, may yara gid sang kasaypanan nga nagakatabo.
Matandaan nga nakuhaan sang video ang katapo sang CORE marshal nga ginkilala kay Danilo Duma-an Sr. nga ginabutang sa siko ang helmet sa baylo nga isuksok sa ulo.
Ginpahayag ni Amigo, nga ila na ginpangayuan sang paathag si Duma-an angut sa iya ginhimo kag gin-ako man sini ang iya nga sala.
Na-isyuhan naman ini sang citation ticket sa paglapas sa nasambit nga ordinansa kun sa diin may yara lang sang lima kaadlaw nga magbayad sang multa kag magapangatubang sang disciplinary action.
Ginsiguro man ni Amigo nga sa pihak sang sini nga pagtilaw, magapadayon sa gihapon sila sa pagpatuman sang ordinansa para sa kaayuhan sang tanan. | Judy Ann Juare
