Multahan kag hatagan sang tsansa nga mag-paathag ang isa ka traffic enforcer nga nasiplatan sang publiko kag nakuhaan sang laragway nga wala nagasuksok sang helmet samtang nagamaneho sang iya motorsiklo sa may bahin sang Taft Street.
Ini ang ginpahayag ni Gonzalo Andrada, pinuno sang Traffic Management Unit (TMU) sang ma-interview sang Brigada News FM Roxas City.
Suno kay Andrada, ginkilala ini kay Osmeña Aguirre kag madugay na nga nagatrabaho bilang traffic enforcer sa syudad.
Bangud sa iya ginhimo nga paglapas sa ginapatuman nga ordinansa, multahan man ini kasubong sa una nga violator nga katapo man sang City Ordinances & Regulations Enforcement (CORE) Unit nga nakuhaan sang video nga ginabutang lang sa siko ang helmet samtang naga-angkas sa motorsiklo.
Dugang pa ni Andrada, iya man ini pasulaton sang paathag kag kun indi mangin valid ang rason sang enforcer ila ini i-refer sa City Government para sa nagakaigo nga disposisyon.
Ginpahayag man sang TMU Head nga wala siya nagkulang sa pagpahanumdom sa iya mga enforcers nga mangin modelo sa publiko pinaagi sa pagsunod sang mga ordinansa nga ginapatuman sa syudad kag ubrahon sang intsakto ang ila trabaho. | Judy Ann Juare
