Pigklaro kan Albay Electric Cooperative (ALECO) na dai man nagtatao nin tabang an National Electrification Administration (NEA) sa mga pribadong kooperatiba kundi loan man sana ang ipigtatao ka ini.
Ini an pigtawan-linaw ni ALECO acting general manager Engr. Wilfredo Bucsit sa sarong press conference kaibahan si Albay Gov. Edcel Grex Lagman.
An saiyang sinabi, katakod kan pahayag kan dating administrasyon na igwa su boot na pigtuga an NEA na itataong tabang na nagkakantidad dosyentos milyones de pesos.
Sa nasambitan na aktibadad, pigtawan man nin duon kan gobernador an sinabi ni Bucsit, asin pigsabi niya na kung matao man nin tabang an NEA sa sarong pribadong kooperatiba, dai na ini su boot na malagpas sa singkwenta milyones de pesos.
Mientrastanto, nagpapadagos man an pangapodan kan ALECO magin kan gobernador sa mga miyembro-konsumidores ka ini na gibuhon an saindang mga obligasyon sa pagbayad sa bill nin kuryente ngareg dai mag-antos sa puntong puputulan na nin kuryente an bilog na probinsya.
Katakod man ini kan pahayag ni Bucsit na en kaso man na dai magbarayad an publiko sa kuryente, bako su boot aharayo an posibilidad na magigin madiklom an bilog na Albay.
