LEGAZPI CITY – Kinumpirmar kan Albay Electric Cooperative (ALECO) na may mga residente man giraray na nagagaramit nin ilegal connection sa probinsya nin Albay.
Segun kay ALECO Information Officer Anj Galero, tulong barangay sa syudad nin Tabaco an nagkadarakop na nagkakaigwang illegal connection partikularmente sa Brgy. Bombon, Bangkilingan asin Panal.
Sinabi niya, may mga reklamo an nagkapirang residente sa nasambit na barangay manungod sa illegal connection.
Pig-adalan asin nagkaigwa muna nin imbestigasyon sa lugar antes inoperar kan nasambit na kooperatiba kasabay an National Bureau of Investigation (NBI) Legazpi.
Maabot man sa siyam na kaharongan sa syudad an nadakop, kun sain kadaklan digdi direct toping asin jumper. Sinabi pa ni Galero, an siisay man na madadakop na nagagamit nin illegal connection, sasangatan nin kasong pagbalgar sa Republic Act 7832 o Anti-Pilferage Act of 1994.
