LEGAZPI CITY – Nakapagrehistro an probinsya kan Albay nin enot na biktima nin paputok kan Disyembre 24, sarong aldaw antes an Kapaskuhan.
Basado ini sa iniluwas na datos kan Department of Health (DOH) Bicol kasuudma.
Sa impormasyong hale sa ahensya, an biktima sarong 20 anyos na lalaki na residente kan Brgy. Tagas, banwaan kan Daraga.
Five-star an paputok na nagkawsa nin injury sa biktima.
Naidara ini sa Bicol Regional Hospital and Medical Center asin nai-discharge naman.
Kasuudma, limang kaso an naidugang sa bilog na rehiyon kan Bicol.
Asin sa kabilugan, nasa anom katawo na an mga kaso sa rehiyon.
Padagos man an pagiromdom kan ahensya na dai na magaramit nin mga paputok nganing ligtas na makapagselebrar nin Bagong Taon.
