-Reymund Titong
KABANKALAN CITY, Negros Occidental— Inadlaw matapos nag-patigayon sang “sugarcane kag soil analyses” ang Sugar Regulatory Administration (SRA), nag guwa sa resulta nga nataas ang acidity level sa duta kag tubo malapit sa bulkan Kanlaon.
Sa report nga ginpalab-ot sang tigpamaba sang SRA-Negros sa Brigada News FM-Kabankalan, matapos ang paglupok sang bulkan, ang acidity level sang mga dahon sang tubo ang yara na sa 4.15 pH kag 5.06 pH naman sa mga duta nga natamnan sang mga ini.
Ang nabalhag nga resulta ang mataas kun e-kumparar sa acidity level sang tinalikdan nga semana nga yara sa 6.48 pH. Ang sa karun nga acidity level, suno sa SRA, ang dapat mabuhinan paagi sa pag-ulan bagud kun indi, kinahanglan sang “soil rejuvenation”, ukon pagbutang sang iban nga organic nga mga materyales parihas sang “compost” para magbalik ang mga nagakadapat nga nutrisyon sang duta.
Sa report nga gin-presentar sang research and development sang SRA, ang una nga epekto sang abo nga gin buga sang Kanlaon, ang makatuga sang pagka-damage sang dahon sang mga tanom kag pakaguba sang balanse sang mga kemikal sang duta nga tuna-an naman sang gamay nga patubas.
Apang, suno man sa SRA, nga sa dalayon, ang mga sugar famers ang maka-benispesyo man sa abo sang bulkan bangud manggaranon ini sa mga minerales kag nutrisyon paryas sang potassium, phosphorus, kag iban pa nga nagapanami sang kalidad sang duta.
Sa karun, yara sa 23,000 ektaryas sang standing crop sang tubo ang apektado bangud sa paglupok sang bulkan Kanlaon, sang Lunes, Hunyo 3.*