GIINSPEKSYON sa taga City Veterinary Office ang mga binuhing baboy sa mga residente sa Barangay Conel, GenSan.
Sa kompirmasyon ni Kapitan Luciano Palma, kaniadtong Sabado Hulyo 23, nakigtagbo kaniya sa barangay hall ang mga opisyal sa City Veterinary Office aron mananghid nga molibot sa matag purok aron magkuha og blood sample sa mga baboy aron e-test kalabot sa African Swine Fever (ASF).
Giyugutan usab ni Kapitan Palma ang mga doktor nga moadto sa mga baboyan sa mga residente, apan gikulbaan kini sa mahimong resulta sa gikuha nga mga blood sample sa mga baboy tungod dako nga kalisod ang posibleng mahatag sa sakit nga ASF ilabi na sa mga tawo nga nagbuhi og baboy nga maoy nahimo nila nga source of income.
Nabalaka usab ang opisyal kay aduna siyay giatiman nga baboy nga giandam niini sa okasyon sa iyang pamilya.
Nanghinaot siya nga mag-negatibo ang test sampling ug dili makasulod ang ASF sa ilang lugar aron walay problema ug dili makasinati og kalisod ang mga residente. I Enamie Mogpon
