SORSOGON CITY – Kinumpirma ng Office of Civil Defense (OCD) Bicol na nasa ligtas na kalagayan ang mga turistang umakyat sa Bulkang Bulusan bago ang pag-alburuto nito.
Ayon sa Municipal Disaster Risk Reduction and Management Office (MDRRMO) ng Barcelona, ligtas na nakababa ang lahat ng 14 na hikers kabilang ang apat na tour guides ng mga ito.
Hindi pinangalanan ang mga nasabing turista pero ayon sa MDRRMO, galing ang mga ito sa NCR at Calabarzon.
Alas 11 ng tanghali nitong Sabado umano nang umakyat ang mga ito sa Bulkang Bulusan kasama ang apat na tour guides.
Dumaan ang grupo sa Barcelona trail mula sa bulkan kaya ligtas ang mga itong nakababa.
