Nagkaayos eon ro tenant ag asawa it sangka SB Member sa banwa it Makato, Aklan bangud sa isyu it pulitika.
Ginkilaea ro complainant nga si Helen Villanueva nga nagaistar sa eugta nga ginapanag-iyahan ni Re-elected SB Member Nerlie Dela Cena it Brgy. Cabatanga sa banwa it Makato, Aklan.
Sa reklamo ni Helen sa Brigada News FM Kalibo, gintawgan sanda ni Mr. Timy Dela Cena nga asawa it nasambit nga SB Member para suguon nga mag straight voting ku nagtaliwan nga eleksyon bangud kung indi segun hay pagapahalinon sanda sa eugta nga andang naistaran.
Pero base sa pahayag sa Brigada ni Mr. Dela Cena nagpangayo malang sanda it bulig sa pamilya ni Villanueva nga kung mahimo hay suportahan si SB Member Nerlie ag owa man segun imaw naghambae nga napahalin ro mga raya sa andang eugta.
Nasayuran nga kusang ginwasak it complainant ro andang baeay nga nakatukod sa eugta it SB Member.
May pitong dag-on eon segun nga nagaistar ro complainant sa andang eugta ag owa man segun nanda ginasukta it renta.
Matapos ro pag istorya sa bulig it Brigada News FM Kalibo hay nagkaayos eonman ro magtimbang nga partido. / ANN DESLENE SALAZAR
