Ginpahayag it Philippine Army’s 3rd Infantry Division (3ID) nga ro mga miyembro it New People’s Army (NPA) hay bukon eamang it mga terorista kundi nagagamit man it ginabawae nga droga.
Raya ro konklusyon it organisasyon matapos ma-recover it militar ro ginapatihan nga shabu ag tooter halin sa kampo it mga rebelde sa Barangay Carabalan, Himamaylan City, Negros Occidental.
Daywang beses nga nakipagsagupaan ro mga tropa it 94th Infantry Battalion sa mga rebelde sa Sitio Cunalom, Barangay Carabalan ku Marso 25. Kasunod dikara ginlusob man nanda ro hideout it NPA kung siin narekober ro mga baril, pampasabog, mobile phone, supply it bugas, ginapatihan nga shabu, tooter, ag iban pa.
Base kay Major General Benedict Arevalo, 3ID commander, nakaalarma ro pagkadiskubre nga ro mga militanteng grupo hay nagagamit it ilegal nga droga para makontrol ro pinsar it mga miyembro kara.
Sa presente, nakipag-coordinate eun ro Philippine National Police ag iban pa nga mga ahensiya sa pagpasaka it mga nakaigo nga kaso angot kara./JIL B. LACSON
