BICOL – UMINABOT na sa Dinagat Island sa Caraga Region an binilog na medical support team kan Department of Health o DOH-Bicol tanganing tumabang sa mga biktima kan Bagyong Odette sa lugar.
An nasabing grupo na igwang trenta y kwatrong mga miyembro an kompwesto nin mga doktor, nurses asin iba pang allied personnel na gikan sa Bicol Medicaal Center (BMC).
Segun ki Mylce Mella-Competente, tagapagtaram kan BMC , kabale digdi an mga medical specialists siring kan obstetricians, anesthesiologists, surgeons, asin internal medicine, onseng nurses, duwang midwives, sarong medical technologist asin radio technologist, tolong nursing attendants, asin iba pang staff kan BMC na nag-volunteer tanganing maging parte kan deployment.
Mantang an mga ini soboot an matiner sa Basilisa Temporary Field Referral Health Facility tanganing magtao nin libreng hospital asin medical care para sa mga apektadong residente mantang nagpapadagos man an pagpapakaray kan mga health facilties sa lugar.
Mantang an BMC nguna soboot an masimbag para sa food asin accommodation kan grupo mantang pighahalat an augmentation gikan sa DOH central office.
Piglalaoman man na matiner an binilog na medical team kan DOH-Bicol sa Mindanao hasta Abril bente kwatro.