KALIBO, AKLAN — Arestado sa ginkasa nga drug buy bust operation kaina it hapon ro sangka babaye sa may ceres terminal sa Brgy. Estancia, Kalibo, Aklan.
Ginkilaea ro naarestong si Rodelia Ventura 43yo ag residente it Brgy. New Buswang, Kalibo.
Unang narekober sa suspek ro sangka sachet it suspected shabu ag sangka karton nga nakapangaean kana.
Kat buksan it mga otoridad ro kahon hay nabuoe ro daywa ka medyas nga kulay itom ag nabuoe pa igto ro dugang nga an-um nga sachets it suspected shabu.
Narekober man ro kapin sa P7,000 nga marked money, cellphone, blender ag mga ID nga nakapangaean sa suspek ag iba pa.
Base sa suspek, halin sa Metro Manila ro kahon nga ginpadaea kana pero owa segun imaw kakilaea kung sin-o ro nagpadaea ag hugot kara nga ginpamalibaran ro nasambit nga akusasyon kontra kana.
Sa makarun hay sa kustodiya eon it Kalibo PNP ro nasambit nga suspek para sa nagakaigu nga disposisyon. / ANN DESLENE SALAZAR
